27 ára NBA stjörnuleikmaður að leggja skóna á hilluna

Á þessari stundu eru þetta ekki staðfestar fregnir, en það bendir allt til þess að stjörnuleikmaðurinn Brandon Roy sem spilar með Porland Trailblazers sé að fara að leggja skóna á hilluna eftir stuttan feril. Ástæðan fyrir því að hann sé að leggja skóna á hilluna svona snemma er vegna þrálátra hnjámeiðsla sem hafa plagað hann síðustu 1 til 2 ár, meiðsli sem hefur verið sagt að ekki sé hægt að laga þar sem að brjóskskortur sé í hnjánum hans. Hann hefur til þessa getað spilað, en þó aðeins í takmörkuðu magni. Brandon Roy hefur verið einn af allra bestu skotbakvörðum NBA deildarinnar síðustu ár, hann á að baki 2 stjörnuleiki og var nýliði ársins í NBA deildinni árið 2007. Hann skoraði að meðaltali 19 stig per tímabil á ferli sínum, mest skoraði hann tímabilið 2008-2009  þegar hann var með rúm 23 stig á leik, það er í raun síðasta tímabilið sem hann var heill. Þessar fréttir koma mjög á óvart þar sem spekingar spáðu því að hann gæti mögulega spilað einskonar varamannshlutverk með liði í deildinni, en svo virðist sem meiðslin hrjá hann meir en vitað var.